البوست المنتظر .. الدليل الشامل ل ازاي تشتغل فريلانسر ويبقي طريقك للسفر
يعني ايه فريلانس أو العمل الحر ؟ ( بالمناسبه هي اسمها الصح فري لانسينج )
.
الفريلانسر هو شخص بيشتغل الشغل اللي هو عايزه في الوقت اللي هو عايزة في المكان اللي هو عايزه مع المدير اللي هو عايزة في التخصص اللي هو عايزة
يعني غير مرتبط بمكان ولا بزمن للشغل ولا بتارجت معين لازم يحققه ولا بتخصص بتدرسه
.
مجالات شغل الفريلانسر لا نهائيه وملهاش حصر .. اي خدمه تقدر تعملها اونلاين مقابل فلوس بتكون فريلانس
زي البرمجه - الجرافيك - تصميم المواقع - تصميم الصور والفيديوهات - تسويق الكتروني - تشتغل مترجم او كاتب بتكتب مقالات او بترجمها - الفويس اوفر للفيديوهات
أو يكون عندك قناه علي اليوتيوب أو مُدونه أو منتدي بيقدم محتوي تعليمي او ثقافي او رياضي الخ الخ
وغيرها ملايين من الحاجات اللي ممكن تشتغلها
---------------------------------------------------------------------------
طيب ايه المؤهلات اللي لازم تتوافر فيك عشان تشتغل الشغل الحر
.
1- عندك skills عاليه علي الانترنت :
نفترض انت مثلا عندك موهبه الكتابه للمقالات الاجنبيه او العربيه سواء مقال رياضي او سياسي او ايا كان
بس مبتفهمش في برامج ال word او PDF .. يبقي هتشتغل ازاي وهتكتب المقالات ازاي ؟ يبقي بديهي جدا تكون عندك كل اساسيات الانترنت عشان تعرف تستفيد من موهبتك دي
.
مثلا انت بتعرف تقلد اصوات او صوتك ليه نبره مميزه وهتبقي ممتاز في الفويس اوفر للافلام والبرامج والفيديوهات .. لكن في نفس الوقت مبتعرفش تستعمل ال sound records وملكش في الانترنت .. يبقي هتستفيد من موهبتك ازاي ؟
يبقي بديهي جدا انك تكون متميز اوي ف الانترنت وعندك الاساسيات الصح كلها عشان تعرف تبتدي
.
اما بقي لو هتشتغل ف مجال الويب ديزاين يبقي ساعتها لازم تكون محترف انترنت وعندك skills عاليه اوي مش مجرد واحد هاوي وخلاص
.
.
2- يكون عندك انجلش كويس اوي :
.
معظم مواقع الفريلانسر الكبيره بتكون بالانجلش .. لازم لغتك تكون كويسه عشان تعرف تتعامل خصوصا في سياسات الدفع والتحويل الفلوس من و الي المواقع
.
لان مش معقول هتفضل فاتح جوجل ترانسليت علي كل كلمه تقف فيها في المواقع وتكون مش عارف معناها !
.
كمان شغل الترجمه كله قايم علي ان لغتك الانجلش تكون بيرفكت .. يعني لو هتشتغل ف مجال الترجمه طبيعي يكون عندك انجلش قوي
.
.
3- يكون عندك موهبه وبتعرف تتعلم وتطور من نفسك بسهوله :
.
في ناس للاسف اعرفها بتقعد بال 6 شهور في كورس واحد للفوتوشوب وال video editing ودة للاسف بسبب ان معندهاش قابليه للتطور او الموهبه اللازمه انك تتعلم بسرعه عشان كدة قبل ما تختار اي مجال وتقول دة بيجيب فلوس كتير ادخله وخلاص .. لا .. لازم تتأكد ان عندك الموهبه اساسا اللي تخليك تقدر تكمل ف المجال ده
و خدها قاعدة
" كل ما مهاراتك زيادة وعدد اللي بيعرفوا يعملوا نفس المهارة بتاعتك دي قليل كل ما هتكسب كتير جدا لكن العكس لو مهاراتك عاديه وكل اللي بيعرفوا يعملوا نفس المهارده بتاعتك دي كتير كل ما هتكسب قليل "
.
.
4- يكون عندك صبر + اداره وقت + تسويق لنفسك :
.
اغلب الناس عايزة تقفش دولارات من اول اسبوع وتجيب البي ام دابليو من كام ساعه علي النت .. لا .. انت لازم تعرف انك هتتعب عشان تعرف تعمل فلوس من الشغل الحر وممكن تقعد اكثر من سنه علي ما تلاقي نتيجه تعبك وفلوس كتير فعلا
.
اداره الوقت انك تكون بتعرف تشتغل تحت ضغط .. لان ساعات هيتطلب منك اتنين تاسك تعملهم في وقت واحد .. ولو معملتهمش هيبقالك نيجاتيف فيد باك .. فلازم تتعلم ازاي تنظم وقتك
.
لو معندكش صبر ومهاره مميزة وحسن اداره للوقت .. متدخلش مجال الفريلانسينج
.
.
5- يكون عندك CV كويس وفيد باك ودي بتتطلبها بعض المواقع زي toptal و people per hour البريطانيه
خامس نقطه دي اهم نقطه اللي هنبدأ بيها الكلام الجد بعيد عن كل الهلس اللي فوق دة
-----------------------------------------------------------------------------
ليه لما بتعمل اكونت ع موقع من المواقع المشهورة زي Fiverr أو up work أو freelancer مثلا وتقعد بال 3 و 4 و 5 شهور مفيش اي حد راضي يعبرك اساسا ؟؟
.
لان لازم يكون عندك فيد باك وتكون اولريدي اشتغلت وعندك خبره .. عشان العميل يختارك انت بالذات
لان كل يوم ليك تقييم .. مع كل عميل جديد وشغل جديد ليك تقييم في النهايه .. فلما كل التقييمات تكون positive كدة هيبقي عندك فيد باك محترم
.
هنرجع لمبدأ دوخيني يا لمونه ! .. مهو انا عشان اخد خبره لازم اشتغل وعشان اشتغل لازم يكون عندي خبره ؟؟
.
لا مش دوخيني يا لمونه ولا حاجه .. شغل الفريلانس مش كله زي بعض .. في مواقع للهواه وفي مواقع للمحترفين .. ومفيش حد بيبدأ السلم من اخره .. لازم تبدأه من اوله
.
في مواقع كتير جدا بتكون لسه حديثه زي I work u اللي اتعمل في يوليو 2016 أو مواقع تانيه زي " اي خدمه " أو " مستقل " أو " خمسات " .. دي بتكون ممتازة للمبتدئين ..
اشتغل عليها واعمل فيد باك كويس عشان تعرف بعد كدة تدخل تصارع مع الجهابزه اللي شغالين ف المجال من 4 و 5 و 6 سنين
.
.
طب هو ممكن اشتغل علي ال Up work مباشره بدون اي خبره سابقه والاقي عملاء يقبلوني ؟؟
.
ممكن عن طريقه حيله ناس كتير بتستعملها .. انك تشوف الشخص اللي طالب الشغلانه وتعمله نص الشغل مجانا for free وتبعتله الشغل .. ولو عجبه شغلك هيبدأ يكلمك حتي لو كنت من غير اي خبره سابقه
.
تجر رجل الزبون بالبلدي .. بتقدم خدمه مجانيه عشان الناس تعرفك ويعجبها شغلك حتي لو معندكش اي خبره في الشغل ومعندكش اي فيد باك ..
-------------------------------------------------------------------------
ياعم انا عارف كل الهري ده .. هو احنا في حصه انشاء .. ما تقولنا الزتونه والكلام اللي بيجيب عيال ومن الاخر في ليلتك السوده دي
.
حاضر هجبلك الزتونه .. تعمل ايه عشان تشتغل في الفريلانسر ؟
ببساطه انت بتدخل علي اي موقع من مواقع الفريلانسر وبتسجل فيه .. الموقع دة بيبقي مسؤل عن اداره العمليه بينك وبين العملاء
.
مثلا عميل طالب شغلانه معينه .. يبعت للموقع .. الموقع ينزلها لكل المشتركين فيه اللي عندهم نفس المتطلبات والمؤهلات اللي العميل يكون طالبها عشان العميل يشوفهم كلهم ويختار بينهم الانسب ليه وبعدين بعد ما تخلص الشغلانه العميل بيحاسب الموقع والموقع بقي هو اللي بيحاسبك بعدين ..
.
بعد ما بتخلص بتاخد فلوسك .. وبتحولها من مواقع الفري لانسينج للبنوك يا عن طريق سكريل أو باي بال .. والتفعيل عن طريق ديكسي باي كارد
.----------------------------------------------------------------------
ثواني بس هنا ياعم الحج .. ايه باي باي ده و سمك ماكريل اللي بتقول عليهم دول ؟؟
كلمني عربي الله يباركلك احنا ناقصين لبخه ف الكلام !
.
بص يا برنجي .. مش انت اشتغلت اهو وخلصت شغلك ع الموقع وكله تمام ؟؟ هتبقي عايز بقي تاخد فلوسك اللي علي الموقع نتيجه شغلك .. لو حولت الفلوس بتاعتك من الموقع بتاع الفريلانس للبنك بتاعك مباشره .. هياخد منك علي كل تحويله 30 دولار يعني بيتخرب بيتك بالبلدي
( في مواقع بتسمحلك انك تحول للبنك مباشره مرة واحدة أو مرتين في الشهر ببلاش )
.
.
طيب تعمل ايه بقي عشان ميتخربش بيتك ؟
.
عشان تحول من الاكونت بتاعك في اي موقع فريلانس للبنك بتاعك هتحتاج وسيط بين الاتنين .. الوسيط دة بقي اسمه ال skrill ( الماني بوكر ) وال pay pal .. ودول بياخدوا واحد دولار بس في التحويله
.
ودة فيديو 30 دقيقه كامله هتعرف فيها طريقه سحب الفلوس من المواقع للبنوك وايه هي عمولات ونسب خصم التحويل المباشر wire transfer و اشهر البنوك الالكترونيه وازاي تسحب الفلوس من سكريل ومن ال pay pal .. يعني فيديو كنز من الاخر
.
ثواني كدة بس يا احمد ! انت كدة معني كلامك اني عشان اعرف اشتغل فريلانسر اصلا لازم قبل ما ابدا في اي حاجه يكون معايا فيزا انترنت ؟ اصل انا معنديش اي حساب ف اي بنك اساسا !
.
لا متقلقش مش لازم تبدأ انه يكون معاك فيزا ، انت ممكن تبدأ الشغل ولما يكون معاك فلوس تبتدي تعمل الفيزا او تستخدم أي طريقة عشان تستلم بيها الفلوس .. اصل هي الحكايه مش بالساهل يعني والشغل مش مرطرط اوي عشان من اول يوم يجيلك فلوس .. انت اصلا ممكن تقعد فتره من غير اي شغل وبالتالي مش هتلاقي فلوس عشان اصلا يكون عندك ليها فيزا انترنت مدفوعه مقدما 
.
ونصيحه ليك معلش ماتفكرش في إنك تسحب المبالغ الصغيرة اللي كسبتها من اول كام عمليه مباشره لأنك هتخسر فيها كتير ومش هتحس بقيمتها .. يعني مثلا تكون اشتغلت قطاعي كام شغلانه من الموقع وجمعت 40 ولا 50 دولار .. متسحبهمش .. هيتخصم منهم كتير دة اولا .. ثانيا هتحس انك مش بتكسب وان الفلوس قليله .. استني لما المبلغ يكون كبير عشان تحس بقيمته وميتخصمش منك كتير
-------------------------------------------------------------------------------------------
طيب ماشي انا فهمت كل ده يا احمد .. ازاي بقي اعمل اكونت علي مواقع الفريلانس دي ؟
وبعد ما اعمل الاكونت المفروض اعمل ايه عشان اشتغل ؟؟
.
الاكونت هتعمله زي اي اكونت بتعمله علي اي موقع
ايميل وتسجيل بيانات عادي وهتكتب حسابات الفيس والانستا بتاعتك وهتحمل صورة ليك ..
.
وهتكتب ال professional title بتاعك اللي هو ويب ديزيانر مثلا او المجال اللي بتشتغله ..
.
وهتكتب ريفيو عنك over view و مهاراتك و ال skills اللي عندك ولو عندك خبرات سابقه وكام شهر او كام سنه خبره اشتغلتهم قبل كده
.
بعدين ال portfolio اللي هو الحاجات والشغل اللي اشتغلته قبل كدة ترفعه علي بروفايلك دة عشان العملاء يشوفوا شغلك ويقيموه هل كويس ولا لأ
.
وبعدين ال certifications لو عندك اي شهادات في المجال ده هترفعها عشان دي اثبات ان عندك خبره ودراسه سابقه
.
وبعدين employment history بتاعتك وتاريخك في الشغل .. الخ الخ ..
.
وبعدين هيسألك عن لغاتك .. الانجلش وهيقولك انتي بتتكلمها بطلاقه ولا متوسط ولا ضعيف وبعدين هيسألك علي اللغه التانيه لو عندك .. كل الحاجات دي مهمه ف البروفايل
.
وبعدين هيسألك علي availability for work .. هل انت مُتاح تشتغل اكثر من 30 ساعه ولا اقل من 30 ساعه .. ولا الاسبوع كله ولا ايه ..
ولازم تظبط الوقت حسب انت مُتاح قد ايه فعلا .. لان لو قولت مثلا انك مُتاح 30 ساعه وجه حد بعتلك شغل وانت كنت مش فاضي هيتعملك نيجاتيف فيد باك انك كنت بتحور عليهم وبتشتغلهم
.
وبعدين هيسألك عن education بتاعك .. متخرج ولا بتدرس ولا ايه ولو عندك شهادة في تخصصك اللي هتشتغله علي المواقع دي ولا لأ
.
باختصار هتملي كل البيانات بالتفصيل الممل .. وبعدين تعمله submit .. ولو عايز تراجع قبل ما تعمل submit ممكن تدوس علي save as الاول عشان تراجع البروفايل لو فيه حاجه ناقصه بعدين قبل ما تعرضه علي الموقع ... بعد كل ده هيديك اتنين اوبشن
يا اوبشن فري من غير فلوس .. يا اوبشن انك تدفع 10 دولار كل شهر عشان تشوف المنافسين بتوعك وشغلهم وجابوا كام كل شهر والمتوسط بتاع الساعه في الشغلانه بتاعتك ومميزات تانيه ..
.
بعد ما بروفايلك بقي جاهز هتلاقي حاجه اسمها skills test يعني بيختبر قدراتك في الانجلش و الشغل بتاعك والمهارات بتاعتك عشان يعرف هتجيب كام من 5 عشان يحط الرقم دة في البروفايل بتاعك
ومتقلقش اجابات كل الامتحانات دي بتكون علي جوجل والكل بيغشها وبيجيب 3 و 4 من 5 ..
.
وبعدين بتدخل علي مربع في اول البروفايل اسمه Find a Job عشان تشوف العروض المتاحه من العملاء في نفس المجال اللي بتشتغله
ومن الاخر كل ما كان البروفايل قوي وعندك مهارات وشهادات ولغات وخبرات سابقه كل ما هتلاقي شغل بالهبل .. والعكس صحيح
.
وعشان عارف التفخيد عليا الطلاق .. جبتلكم فيديو ساعه وربع بالكامل عن ازاي تسجل خطوة بخطوة في موقع Upwork ويبقي عندك بروفايل فيه .. بطلوا تفخيد وشوفوه
----------------------------------------------------------------------
طيب يا دكتره من الاخر كدة ... انا ابيض ميييييييييييييييييييييييييح .. لا عندي لغه ولا مهاره ولا بفهم في الانترنت ولا عندي خبرات .. اعمل ايه عشان اشتغل ؟؟
.
ببساطه لازم تتعلم كل ده الاول .. يعني لازم تتعلم انجلش وبعدين تتعلم المهنه اللي عايز تشتغلها بكورسات تعليميه وبعدين تتعلم ازاي تشتخدم الانترنت
وفي الاخر خالص بقي تدور علي انك تعمل اكونت علي مواقع الفريلانس
.
يعني مثلا انت عايز تشتغل ويب ديزاينر بس مبتفهمش فيه .. ساعتها لازم تاخد كورسات الاول فيها وتبقي متمكن فيها كويس .. لكن مينفعش تكون ابيض وتقول عايز اشتغل ويب ديزاينر من علي Up work مثلا
.
.
ياعم هو انا معايا فلوس للكورسات ؟؟ هو انا عشان اجيب فلوس لازم ادفع فلوس ؟؟
.
ولا تزعل نفسك .. اتعلم اونلاين .. ادخل علي موقع كورسيرا واتعلم المجالات مجانا
- ودة لينك الموقع
.
- ودة لينك شرح عربي ل ازاي اصلا تستخدم الموقع
.
- ودة لينك للكورسات الاونلاين اللي ممكن تاخدها في المجالات اللي حابب تستغلها
-----------------------------------------------------------------
طيب يا ابو حميد .. ايه مواقع الفريلانس اللي ادور فيها علي شغل بموهبتي اللي انا عارفها ؟
فيه مليون موقع تقدر تدور فيهم .. وكل موقع وعلي حسب شغلك وتخصصك .. لكن هجبلك لوكشه منهم تشوفهم وتسجل فيهم ..
--------------------------------------------------------------------------------
شويه المعلومات اللي فوق دول بيتباعوا بالدولار وبالالافات في مراكز الكورسات والندوات .. تلاقي واحد عامل صفحه وعنده كام فولو يقولك تعالالي السنتر الفلاني في مدينه نصر او المعادي عشان اشرحلك الفريلانس وازاي تشتغله
.
مع انه كلام سهل فشخ ومش محتاج ان حد يشرحهولك اصلا .. لكن عشان بيلاقوا مغفلين بيدفعوا فلازم يعملوا سبوبه حلوة منك .. الكلام قدامك اهو مجانا .. اسعي واتعب من غير ما تخلي حد يستغفلك
.
ليست هناك تعليقات :