ابنك او بنتك اللي عنده ٧ او ٨ سنين يقول لك انه "بيحب"

عزيزي الأب ... عزيزتي الام

لما ابنك او بنتك اللي عنده ٧ او ٨ سنين يقول لك انه "بيحب" ما تتخضش ...

لازم ما تتخضش علشان ما ترعبوش من كلمة الحب ... واوعي تستخدم كلمات من نوع (انت لِسَّه عيل - ايه العبط ده - إِيش فهمك انت في الموضوع ده - عيب كده - حرام كده)

بجانب انك هتكون ميت من الضحك ... لازم تمسك نفسك وما تضحكش وما تستخفش بكلامه

حاول واستوعب الكلام بهدوء علشان يفضّل صاحبك ويحكي لك دايماً اللي بيحصل معاه -تعرف منه احسن ما تعرف صدفه-

فهمه ان الحب شيئ جميل بدايةً من حب الله عز وجل لعباده وحب الرسول لأمته والصحابه لبعض وانتهاءً بحب البشر الدنيوي لبعضهم البعض بجميع صوره

أكد علي مبدأ ان الحب الصح انك تخاف ربنا في اللي بتحبهم وتحافظ عليهم

وضح ان فيه مراحل ومشاعر كتير شبه الحب ... الاهتمام والصداقة وأنهم كلهم بيعدوا علينا مع ناس كتير وادي امثله علي اصحاب قريبين ليك (نصيحه للابهات: بلاش التاريخ العاطفي بتاعك من رابعه ابتدائي يخش في الموضوع الله يكرمك)

بعد المحاضره النظري ...

اسأله "طيب انته قلت لي وانا عرفت 😊 عايز تعمل ايه دلوقتي ...؟" هتسمع ردود تهلك من الضحك .. اسمع للآخر ابدأ رد علي حاجه حاجه وابتدي بهدوء تربط التصرفات بالسن والصح والخطأ والحلال والحرام (في حدود ربنا بيحبنا نعمل ايه وبيزعل مننا لو عملنا ايه) ببساطه شديده

بعد كام يوم ... اساله اخباره ايه وقول علي اسم السيكو سيكو 😉 لو حكي ... خير ... اسمع وعلق ببساطه من غير انفعال

لو قرر يطنش احترم ده وما تزنش ... ببساطه ممكن يكون نسي الموضوع اصلاً ... او بدأ يحس بحد تاني 😄😄

دورة حياة الموضوع ده تقريباً أسبوع 😂

بس ده لو الواد اللي بيحكي ..!!!

لو ابوه لمح بس بيكون الكتالوج مختلف طبعاً تماااااماً 😂